اسلام آباد۔22اگست (اے پی پی) وزیراعظم محمد شہباز شریف آکھیے جو ملک اچ مینھ اتے چھل پاروں 700 توں زیادہ لوک فوت تھئن، چھل توں متاثرہ علاقیں اچ بحالی اتے تعمیر نو دا کم مکمل تھیوݨ تئیں سکون نال نہ ٻہسوں ، متاثرین دی امداد اتے بحالی ساݙی سانجھی ذمے واری اے، رَل تے کم جاری رکھیسوں، پاݨی دے وہݨ تے بݨیاں ہوئیاں غیر قانونی عمارتاں دا معاوضہ کݙاں تئیں وفاقی اتے صوبائی حکومتاں ادا کریندیاں رہسن؟ ماحولیاتی تبدیلیاں دے خراب اثرات نال نبڑݨ کیتے ذمے واریاں ودھ ڳئیاں ہن، دورہ چین دے دوران ایس سی او اجلاس اچ شرکت دے علاوہ چینی قیادت نال ݙو طرفہ ملاقاتاں تھیسن، سی پیک دے ݙوجھے مرحلے دا وی آغاز تھیسی ۔انہاں اے ڳالھ وفاقی کابینہ دے اجلاس اچ ڳالھ مہاڑ کریندیں آکھی۔ وزیراعظم آکھیا جو اڄوکے ݙینھاں اچ ملک اچ طوفانی مینھ پاروں دریاواں اچ پاݨی ودھ ڳئے خاص کر خیبر پختونخوا اچ کلاؤڈ برسٹ نال آوݨ آلی چھل نال وݙے پیمانے تے جانی و مالی ضیان تھئے، ݙو ݙینھ پہلے اساں بونیر دا دورہ کیتا، اتھاں ٻہوں زیادہ جانی اتے مالی نقصان تھئے، ایویں سوات، شانگلہ، صوابی، مانسہرہ اتے ݙوجھے علاقیں اچ وی ٻہوں ضیان تھئن ۔”انہاں آکھیا جو آفت دے ایں ویلھے اچ وفاقی حکومت صوبائی حکومت دے نال رَل تے کم کیتے اتے اخلاص نال تعاون کیتے، وفاقی وزراء امدادی سرگرمیاں اچ بھرپور حصہ ڳھدا، وفاقی وزیر اطلاعات جیڑھیاں کوششاں تھیندیاں رہیاں انہاں کوں اُجاگر کیتے، وفاقی وزیر امور کشمیر و گلگت بلتستان انجینئر امیر مقام دی قیادت اچ بھرپور طریقے نال امدادی کم جاری ہن، امداد اتے ریلیف دے کماں اچ وفاقی وزراء، سیکرٹریز اتے چیئرمین این ڈی ایم اے دا کم اہم رہیا، ریسکیو اتے ریلیف دیاں سرگرمیاں اچ حصہ گھنݨ آلیں دا ٻہوں شکر گزار ہاں لیکن اے کم حالی جاری اے، ریسکیو سرگرمیاں مکمل تھی ڳئن، ریلیف اتے بحالی دا کم جݙاں تئیں مکمل نئیں تھیندا سکون نال نہ ٻہسوں، مینھ نال فوت تھیوݨ آلے لوکاں دے لواحقین کوں معاوضے دی ادائیگی کیتی ویندی پئی اے لیکن جنہاں دے پیارے دنیا توں چلے ونڄن انہاں کیتے اے بے معنی تھی ویندے لیکن زندگی کوں اڳوں ودھاوݨ، علاج معالجے، کاروبار اتے ݙوجھیاں لوڑھاں نال اے چیزاں جُڑیاں ہوئیاں ہن، ایں کیتے اساں کوں متاثرین کیتے بھرپور تعاون کرݨا ہوسی اتے پورے اخلاص نال سیاست توں ہٹ تے انہاں دی مدد کرݨی ہوسی۔”وزیراعظم آکھیا جو پاک فوج دے سپہ سالار فیلڈ مارشل سید عاصم منیر دی سربراہی اچ افواج پاکستان امدادی سرگرمیاں اچ بھرپور حصہ گھندی پئی اے، سپہ سالار میݙے نال بونیر دا دورہ کیتا، اتھاں اساں کوں مینھ اتے چھل نال تھیوݨ آلے نقصانات اتے امدادی سرگرمیاں دے بارے اچ تفصیلی بریفنگ ݙتی ڳئی، صوبائی حکومت اتے وفاقی حکومت دے نمائندیں دے علاوہ کور کمانڈر پشاور بھرپور پریزنٹیشن ݙتی، پاک فوج دے افسراں اتے جواناں پرے دے علاقیں اچ ونڄ تے متاثرین کوں کڈھیا، ہیلی کاپٹر وی امدادی سرگرمیاں اچ حصہ گھندے پئن، متاثرین دی امداد اتے بحالی ساݙی سانجھی ذمے واری اے، رَل تے کم جاری رکھیسوں۔”انہاں آکھیا جو “2022ء اچ سندھ اچ شدید آفت آئی ہئی اتے اوں ویلھے سندھ اچ ٻہوں زیادہ نقصان تھیا ہئی، ایں دے علاوہ بلوچستان، جنوبی پنجاب دے کجھ ضلع اتے کے پی اچ وی ضیان تھیا ہئی، سندھ اچ ساریں توں زیادہ تباہی تھئی ہئی، 2022ء دے تباہ کن مینھ اتے چھل نال 100 اموات تھئیاں جݙاں جو ارباں ڈالر دا مالی نقصان تھیا ہئی لیکن ایں واری ملک اچ 700 توں زیادہ موتاں تھئن اتے صرف خیبر پختونخوا اچ 400 توں زیادہ لوک فوت تھئن، پہاڑاں توں وݙے وݙے پتھر اتے وݨ پاݨی دے نال رُڑھ تے آون تاں انہاں دے سامݨے کَون کھڑ سڳدے۔ وزیراعظم آکھیا جو “2022ء اچ معاشی نقصان بہوں زیادہ تھیا ہئی لیکن جانی نقصان گھٹ ہئی، ایں واری جانی نقصان زیادہ تھئے ۔”انہاں آکھیا جو “ماحولیاتی تبدیلیاں دے خراب اثرات نال نبڑݨ کیتے ساݙیاں ایں حوالے نال ذمے واریاں ودھ ڳئن، ایں کیتے ماحولیاتی تبدیلی دی وزارت اتے متعلقہ اداریں کوں آپݨا بھرپور کردار ادا کرݨا ہوسی۔ انہاں آکھیا جو ترائے ݙینھ پہلے کراچی اچ تباہ کن مینھ تھیا، وزیراعلیٰ سندھ نال وی میݙی فون تے ڳالھ تھئی، انہاں نال اظہار ہمدردی کیتا اے، بلاول بھٹو زرداری نال وی رابطہ تھئے، ایویں گلگت بلتستان اتے آزاد کشمیر اچ وی نقصان تھئے، گلگت بلتستان دا میں خود دورہ کیتا، وفاقی حکومت دے نمائندیں اتھاں ٻہوں کم کیتا اے لیکن اے اساں ساریاں دی ہک سانجھی ذمے واری اے جیں کوں اساں نبھاوݨا اے، مینھ نال متاثرہ آزاد کشمیر اتے گلگت بلتستان دے علاقیں اچ وی بحالی دا کم جاری اے۔” وزیراعظم آکھیا جو “پاݨی دے وہݨ تے بݨیاں ہوئیاں غیر قانونی عمارتاں دا معاوضہ کݙاں تئیں وفاقی اتے صوبائی حکومتاں ادا کریندیاں رہسن، 2022ء دے تباہ کن چھل اچ وی غیر قانونی عمارتاں دی وجہ نال وݙے پیمانے تے نقصان تھیا ہئی، اساں کوں انہاں چیزاں کوں مدنظر رکھݨا چاہیدے، دریاواں اچ ہوٹل اتے ݙوجھیاں عمارتاں نئیں ہوݨیاں چاہیدیاں، غیر قانونی عمارتاں دی روک تھام نال متعلق اہم اجلاس سݙیا ویندا پئے، انسانی کوتاہیاں دے نتیجے اچ تھیوݨ آلے حادثیں دی کوئی گنجائش کائنی ۔انہاں آکھیا جو “گلیات اچ کݙاہیں کوئی ہک وݨ نہ ڈھا سڳدا ہئی ، اڄ گلیات اچ وݨ دے کٹاؤ تے ݙکھ تھیندے۔”وزیراعظم آکھیا جو “چین دے وزیر خارجہ پاکستان دا دورہ کیتے، وزارت خارجہ اچ ہک بھرپور اجلاس تھئے، میݙے نال وی انہاں دی ٻہوں چنڳی ملاقات تھئی اتے جامع ڳالھ مہاڑ کیتی ڳئی، چین پاکستان دوستی ویلھے دے نال نال مضبوط تھیندی پئی اے اتے چین ہمیشہ پاکستان دے نال تعاون کیتے اتے دوستی دا ہتھ ودھائے، ݙوہیں ملکاں وچال سٹریٹجک سانجھے داری اے، وختی چین دا دورہ کریندا پیاں، دورہ چین دے دوران ایس سی او اجلاس اچ شرکت دے علاوہ ݙو طرفہ ملاقاتاں تھیسن، سی پیک دے ݙوجھے مرحلے دا وی آغاز تھیسی چین اتے پاکستان دے تعلقات سدا بہار ہن اتے اے ہمیشہ ودھدے رہسن
.jpg)
