لاہور۔24اگست (اے پی پی) آندے 48 گھنٹے اچ زور دا مینھ وسݨ پاروں پنجاب دے وݙے دریاواں اچ چھل دا ݙر اے ، ترجمان پی ڈی ایم اے موجب 27 اگست تئیں مینھ پاروں پنجاب دے دریاواں اچ درمیانے توں اُچے درجے دی چھل دا ݙر اے ۔ پنجاب دے نارتھ اتے نارتھ ایسٹ ضلعیں اچ فلیش فلڈنگ دا الرٹ جاری کر ݙتا ڳئے۔ مینھ پاروں دریائے جہلم، چناب، راوی، ستلج اتے انہاں نال جُڑئے ندی نالیں اچ وی طغیانی دا الرٹ جاری کر ݙتے۔ دریائے جہلم اتے چناب اچ آندے 48 گھنٹے اچ درمیانے توں اُچے درجے دی چھل دا ݙر اے۔ دیرہ غازی خان دیاں رودکوہیاں اچ وی چھل دی صورتحال تھی سڳدی اے۔ ترجمان موجب دریائے ستلج اچ گنڈا سنگھ والا دی جاہ تے اُچے درجے دی چھل اے۔ گنڈا سنگھ والا دی جاہ تے پاݨی دا وہݨ 1 لکھ 26 ہزار کیوسک اے۔ ہیڈ سلیمانکی دی جاہ تے درمیانے درجے دی چھل اے ۔ سلیمانکی دی جاہ تے پاݨی دا وہݨ 90 ہزار کیوسک اتے اخراج 82 ہزار کیوسک اے۔ ایں طرح دریائے سندھ اچ تربیلا تے تلویں درجے دی چھل اے۔ دریائے سندھ اچ تونسہ، کالاباغ اتے چشمہ تے پاݨی دا وہݨ نارمل سطح تے اے۔ دریائے راوی اچ جسڑ دی جاہ تے 49 ہزار، شاہدرہ 14 ہزار، بلوکی 41 ہزار اتے ہیڈ سدنائی اچ پاݨی دا وہݨ 36 ہزار کیوسک اے۔ نارروال نالہ بسنتر اچ تلویں درجے دی چھل دی صورتحال اے۔ ڈی جی پی ڈی ایم اے عرفان علی کاٹھیا آکھیے جو دریاواں دے پاٹ اچ موجود شہری جلدی محفوظ جاہ تے منتقل تھی ونڄن۔ حکومت پنجاب ولوں چھل توں متاثرہ علاقیں اچ فلڈ ریلیف کیمپس قائم کر ݙتے ڳئن۔ فلڈ ریلیف کیمپس اچ ساریاں بنیادی سہولتاں اتے دوائیں ݙتیاں ویسن۔ انہاں شہریاں توں اپیل کیتی جو موسم وچھل دی صورتحال پاروں احتیاطی تدابیر اختیار کرن۔ دریاواں، نہراں اتے ندی نالیں تے سیر و تفریح نہ کیتی ونڄے ۔ ٻالاں دا خاص خیال رکھن اتے انہاں کوں دریاواں ندی نالیں اچ اصلوں نہ دھاوݨ ݙیون
