اسلام آباد۔1مئی (اے پی پی) وزیراعظم محمد شہباز شریف ملک اچ دیامر بھاشا ڈیم سویں منصوبیاں کوں ترجیحی بنیاداں تے مکمل کرݨ دی ہدایت کریندیں ہوئیں آکھیا جو توانائی دے منصوبے پورے کرݨ اچ کہیں قسم دی دیر قبول کائنی۔ خمیس کوں وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف دی صدارت ملک اچ بجلی دے نرخاں اچ ڳھٹکی اتے توانائی دے شعبے اچ پائیدار اصلاحات بارے انٹیگریٹڈ جنریشن کپیسٹی ایکسپنشن پلان (آئی جی سی ای پی 2024-2034) دا اجلاس تھیا۔ ایں موقع تے ڳالھ مہاڑ کریندیں ہوئیں وزیراعظم آکھیا جو بجلی دے نرخاں اچ اڄوکے ساݙھے ست روپے دی ڳھٹکی دے بعد حکومت پاکستان عوام کوں ٻئی سہولتاں ݙیوݨ کیتے حکمت عملی تے عمل کریندی پئی اے۔ انہاں آکھیا جو توانائی دے منصوبے پورے کرݨ اچ کہیں قسم دی دیر قبول کائنی، وزیراعظم محمد شہباز شریف دی انٹیگریٹڈ جنریشن کپیسٹی ایکسپنشن پلان دے اجلاس اچ دیامر بھاشا ڈیم سویں منصوبیاں کوں ترجیحی بنیاداں تے مکمل کرݨ دی ہدایت کیتی۔ وزیراعظم آکھیا جو ملک اچ جلدی بجلی دی پیداوار کیتے فری مارکیٹ ٻݨائی ویسی۔ اجلاس اچ وزیراعظم کوں توانائی دے شعبے اچ اصلاحات دا ݙسیا ڳئیا۔ بریفنگ اچ ݙسیا ڳئیا جو وزیراعظم دی ہدایت تے آئی جی سی ای پی دا ولا جائزہ ڳھدا ڳئیا تاں پتہ لڳے جو ایندے اچ ٻئی گنجائش اے۔ بریفنگ اچ ݙسیا ڳئیا جو اگلے ݙاہ سالیں کیتے بجلی دے پیداواری منصوبیاں اچ مسابقتی بولی اتے ڳھٹ ترین قیمت تے بجلی دی فروخت کیتے راہ ہموار کیتا ڳئے، کل 7967 میگا واٹ دے مہانگے منصوبیاں کوں بجلی دی پیداوار دے منصوبے (آئی جی سی ای پی) توں کݙھیا ویندا پئے۔ بریفنگ اچ ݙسیا ڳئیاجو مہانگے منصوبیاں کوں پلان توں کݙھݨ نال مجموعی طور 17 ارب ڈالر (4743 ارب روپے ) دی بچت تھیسی۔ وزیراعظم وفاقی وزیر پاور سردار اویس لغاری اتے انہاں دی ٹیم کوں ملک کیتے 4743 ارب روپے دی بچت دی تعریف کیتی۔ اجلاس اچ وزیر توانائی سردار اویس لغاری، وزیر اقتصادی امور احد خان چیمہ،وزیر اطلاعات تے نشریات عطاء اللہ تارڑ، وزیر پٹرولیم علی پرویز ملک اتے متعلقہ اداریاں دے اعلیٰ افسرشریک ہن۔
