لندن۔21ستمبر( اے پی پی) وزیراعظم محمد شہباز شریف اتحاد تے یکجہتی دی اہمیت کوں اجاگر کریندے آکھیا جو 10 مئی دی فتح دشمن کوں اوہ سبق سکھائے جینکوں او زندگی بھر یاد رکھیسی، اساں پاکستان کوں عظیم عسکری قوت بݨایا، ہݨ اینکوں معاشی قوت بݨیسوں، سمندر پار مقیم پاکستانی ملک دے عظیم سفیر ہن جیڑھے دنیا وچ ہر فورم تے ملک دا دفاع کریندن، جے کوئی اے سمجھدے جو کشمیر دے مسئلے کوں حل کیتے بغیر باہمی تعلقات استوار تھی سڳدن تاں او احمقاں دی جنت وچ رہندے، کشمیریاں دا خون ضائع نہ ونڄݨ ݙتا ویسی، مسئلہ کشمیر، پاݨی دے مسئلے، تجارت تے انسداد دہشتگردی تے برابری دی بنیاد تے ڳالھ مہاڑ کرݨ چاہندوں ۔ لندن وچ سمندر پار پاکستانیاں دے حوالے نال تقریب توں خطاب کریندے وزیراعظم سمندر پار پاکستانیاں کوں 10 مئی دی فتح تے معرکہ حق دی عظیم کامیابی دی مبارخ ݙیندے آکھیا جو اے او فتح اے جیندے ذریعے دشمن کوں او سبق سکھائے جینکوں او زندگی بھر یاد رکھیسی۔ وزیراعظم محمد شہباز شریف آکھیا جو میں کیتے انتہائی مسرت تے فخر دی ڳالھ اے جو میں سمندر پار مقیم عظیم پاکستانیاں دے سامݨے کھڑاں، جیڑھے ملک دے اوعظیم سفیر ہن جیڑھے یورپ، برطانیہ، شمالی امریکہ وچ تے مشرق وسطیٰ تے مشرق بعید وچ ݙینھ رات محنت کریندن تے دیار غیر وچ رزق حلال کمدن، میں صدق دل نال اعتراف کرݨ چاہنداں جو او محنت نال رزق حلال کمدن، گزریل سال خون پسینے دی کمائی کنوں ساڈھے 38 ارب ڈالر پاکستان بھڄوائن، ایندے بغیر پاکستان دی معیشت اڳوں نی ٹر سڳدی جیندے تے او کوں سلام تے خراج تحسین پیش کرینداں۔ وزیراعظم محمد شہباز شریف آکھیا جو سمندر پار پاکستانی نہ صرف معاشی طور تے بلکہ سیاسی طور تے وی پوری دنیا وچ ملک دا ہر فورم تے دفاع کریندن، ایندے تے وی او کوں سلام پیش کرینداں۔ وزیراعظم آکھیا جو دیار غیر وچ ڈاکٹرز، انجینئرز، کاروباری افراد تے محنت کش جیویں ݙینھ رات محنت کریندن، اے پاکستان دی عظیم صفات ہن جو پوری دنیا وچ او بطور محنت، دیانتداری تے باوقار پاکستانی خدمات متعارف کرائن۔ وزیر اعظم سمندر پار پاکستانیاں کوں 10 مئی دی فتح تے عظیم کامیابی دی مبارخ ݙتی تے آکھیے اے او فتح اے جیں دشمن کوں او سبق سکھایا او زندگی بھر یاد رکھیسی۔ وزیراعظم آکھیا جو جݙاں اساں تے بے جا الزام لاتا ڳیا تاں میں کاکول وچ بیان ݙتا تے آکھیا جو پاکستان دا ایں واقعے کنوں پرے تئیں کوئی تعلق کائنی تے میں اعلان کیتا جو ہک عالمی کمیٹی قائم تھیوے جیڑھی پہلگام واقعے دی شفاف تحقیقات کرے پر ہمسایہ ملک دا کوئی جواب نی آیا بلکہ 6 مئی کوں دشمن پاکستان دے خلاف حملہ کیتا تے بے گناہ پاکستانیاں تے مسیتاں تے شہری املاک تے حملے کر تے نقصان پڄایا جیندے تے پاکستان کوں اپݨے دفاع وچ کارروائی کرݨی پئی تے ہک جھٹکے وچ دشمن دے 6 جہاز زمین بوس کر ݙتے ڳئے، دشمن کوں چند گھنٹے وچ پتہ لڳ ڳیا جو جے ڳالھ نکلدی اے تاں ٻہوں پرے تائیں ویندی اے۔ سویلے ڈھائی وڄے چیف آف آرمی سٹاف جنرل سید عاصم منیر دا میں کنے فون آیا تے آکھیا جو جناب وزیراعظم او کوں ݙسݨا چاہنداں جو دشمن اساں تے ول حملہ کر ݙتے۔ انہاں آکھیا جو جناب وزیراعظم میکوں اجازت ݙیوو، دشمن چونکہ ول مکروہ حرکت کیتی اے، اینکوں او سبق سکھیسوں جو اوہ زندگی بھر یاد رکھیسی۔ وزیر اعظم آکھیا جو ہݨ میں کجھ عرب دوست ملکاں کنوں تھیندا ہویا آیاں، اتھاں ہک ملک دے سربراہ میں کنوں پچھیا جو او کہڑیاں ݙو ڳالھیں ہن جیڑھیاں پاکستان دی عظیم فتح دی وجہ بݨئن، جیندے تے میں جواب ݙتا جو ہک وجہ افواج پاکستان دی دلیری، شجاعت تے پیشہ ورانہ مہارت، اللہ تعالیٰ تے بھروسہ تے ٻہوں ساریاں جدید تے اعلیٰ سطح دی تربیت تے ݙوجھی سیاسی تے عسکری قیادت دی سوچ وچ مکمل اتحاد تے ہم آہنگی تے تریجھی ڳالھ جیڑھی میں انہاں کوں آکھی تے ݙسی جو او غیر متزلزل عزم جو اساں پچھوں مڑ تے نی ݙٹھا۔ وزیراعظم آکھیا جو فیلڈ مارشل سید عاصم منیر ایں جنگ دی قیادت کیتی، انہاں دی بری فوج دے جواناں تے افسراں اپݨی اعلیٰ ترین کارکردگی ݙکھائی تے اساݙے شاہیناں تے ایئر چیف ظہیر احمد بابر بہترین انداز وچ جھپٹ جھپٹ تے دشمن کوں قابو کیتا تے اللہ تعالیٰ دے فضل نال پاکستان کوں او سرفرازی عطا فرمائی جیندی اڄوکی تاریخ وچ کوئی مثال نی ملدی۔ وزیراعظم آکھیا جو پوری قوم کراچی کنوں پشاور تائیں سجدہ ریز ہئی تے اللہ تعالیٰ عظیم پاکستانیاں کوں او فتح ݙتی جو اڄ مغرب کنوں مشرق تائیں لوک پاکستان دے سارے پاسپورٹ کوں ݙیکھدن تاں آہدن جو اساں عظیم پاکستانیاں کوں سلام پیش کریندوں ۔ وزیراعظم آکھیا جو ایں معرکہ حق دے آپریشن وچ جینکوں اساں آپریشن بنیان مرصوص آہدوں دے دوران دشمن دا ہک گولہ لیفٹیننٹ کرنل ظہیر عباس دے گھر دے نیڑے آ تے لڳا جیندے نتیجے وچ انہاں دے کمسن پتر ارتضیٰ عباس شہید تھی ڳئے جݙاںجو لیفٹیننٹ کرنل ظہیر عباس لائن آف کنٹرول تے اپݨی ذمہ واری ادا کریندے پئے ہن۔ وزیر اعظم آکھیا جو میں ، صدر مملکت آصف علی زرداری تے آرمی چیف فیلڈ مارشل سید عاصم منیر ایں نکے شہید دا جنازہ پڑھیا تے شہید دا چہرہ پھل وانڳوں کھلیا ہویا ہئی۔ وزیراعظم آکھیا جو اساں ایں قبیح حرکت دا بھرپور بدلہ گھدے، جنگ بندی تھی چکی، ہݨ اساں امن چاہندوں، ترقی تے خوشحالی چاہندوں تے پاکستان دے اندر بے روزگاری دا خاتمہ تے سرمایہ کاری چاہندوں۔ وزیر اعظم آکھیا جو اساں اے پیش کش ڈھیر واری دنیا دے سامݨے رکھی اے تے دنیا اساݙی ڳالھ سݨی اے۔ وزیر اعظم آکھیا جو میں اے ڳالھ ڈھیر واری آکھی جو اساں مسئلہ کشمیر، پاݨی دے مسئلے، تجارت تے انسداد دہشتگردی تے برابری دی بنیاد تے ڳالھ مہاڑ کرݨ چاہندوں۔ وزیر اعظم آکھیا جو اساں خطے وچ ہمسایہ ملک ہیسے تے اے اساں تے منحصر اے جو اساں امن نال رہسوں یا جھیڑے ہمسائیں وانڳوں رہسوں۔ وزیر اعظم آکھیا جو اے اساݙی دلی خواہش اے جو اساں عزت تے وقار نال رہوں تے ایندے کیتے کشمیر دا مسئلہ حل تھیوݨ ہک بنیادی ستون اے،جے کوئی اے سمجھدے جو کشمیر دے مسئلے کوں حل کیتے بغیر تعلقات استوار تھی سڳدن تاں او احمقاں دی جنت وچ رہندے۔ وزیر اعظم آکھیا جو کشمیریاں دا خون ضائع نہ ونڄݨ ݙتا ویسی ، ایویں ای غزہ وچ جیڑھا ظلم و ستم کیتا ویندا پئے، فلسطین تے غزہ دے اندر 64 ہزار بزرگ، تریمتاں ، نکیاں ں تے ٻال شہید تھی ڳئن، انہاں دی خوراک تے ادویات بند کر ݙتیاں ڳئن۔ وزیراعظم آکھیا جو میں سمجھداں جو غزہ دی پٹی دے علاقے دے تناسب نال 64 ہزار شہادتاں ایندے خطے دے اندر کݙاہیں نی تھیاں، ایندی زندگیاں کݙاہیں تباہ نی تھیاں، ݙیکھدی اکھ ایویں دلخراش منظر کݙاہیں نی ݙٹھے۔ وزیر اعظم آکھیا جو ہݨ وقت آ ڳئے جو انہاں خطیں وچ ہݨ امن قائم تھیوݨا چاہیدے تے اسلامی دنیا کوں اڳوں ٹر تے امن کیتے ڳالھ مہاڑ کرݨی چاہیدی اے تے اپݨا لوہا منواوݨا چاہیدا اے۔ وزیر اعظم شہباز شریف آکھیا جو کݙاہیں وی کوئی قوم محنت تے محنت دے بغیر اچا مقام حاصل نی کر سڳدی، اساݙی اے فتح اللہ تعالیٰ دے خاص انعام و اکرام تے افواج پاکستان دے عظیم ولولے تے شجاعت تے عسکری قیادت فیلڈ مارشل سید عاصم منیر دا او دلیرانہ تے منجھا ہویا کردار جیندی وجہ کنوں اللہ تعالیٰ اساں کوں اے فتح نصیب کیتی۔ وزیر اعظم آکھیا جو میں اڄ اتھاں اے ڳالھ آکھݨا چاہنداں جو سمندر پار پاکستانیاں دی ساڑھے 38 ارب ڈالر دی ترسیلات زر دے بغیر پاکستان دی معیشت دا پیتھا اڳوں نی ٹر سڳدا تے انشاء اللہ تارکین وطن اینکوں اڳوں ٹریسن۔ وزیراعظم آکھیا جو اساں کوں قرضیں کنوں نجات حاصل کرݨی اے تے اپݨے پیراں تے کھڑے تھیوݨا اے، جتھاں اساں پاکستان کوں عظیم عسکری قوت بݨایا، ہݨ جݙاں اینکوں معاشی قوت بݨیسوں تاں اساں کوں وی دنیا اڳوں ٹر تے اوہو احترام ݙیسی جٰڑھا ݙوجھیں کوں ملدا پئے۔ وزیر اعظم آکھیا جو اساݙی قوم وݙی عظیم تے جری قوم اے تے پاکستان دی آبادی 60 فیصد حصہ نوجواناں تے مشتمل اے۔ وزیر اعظم آکھیا جو چین دی کہاوت اے جو ہر چیلنج موقع ہوندے، جتھاں 15 کنوں 30 سال دے اساݙے نوجواناں تے مشتمل 60 فیصد آبادی دا حصہ ہک چیلنج اے اتھاں اے ہک موقع وی اے جو اساں اپݨے نوجواناں کوں انفارمیشن ٹیکنالوجی، مصنوعی ذہانت، پیشہ ورانہ تربیت تے ووکیشنل ٹریننگ ݙٰیوں، پاکستان ایندا آغاز کر ݙتے۔ وزیر اعظم آکھیا جو پاکستان کنے تیل تے گیس دے ٻہوں گھٹ ذخیرے ہن، اساݙا اثاثہ اساݙی نوجوان نسل اے جے اساں اپݨی نوجوان نسل کوں بہترین تربیت تے علم نال آراستہ کریسوں تاں اے پاکستان تے ایندے پرچم کوں آسماناں تائیں گھن ویسی کیوں جو صرف تے صرف محنت ہی او امر ہے جیں کنوں قوماں بݨدئن تے سمندر پار پاکستانی عظیم سفیر ہن، پاکستانی قوم عظیم قوم اے تے جے اساں اے فیصلہ کر گھنوں جو اساں کوں غربت دا خاتمہ کرݨا اے تاں جیویں دشمن دے 6 جہاز ڈھائے ایویں غربت دا خاتمہ وی کرتے ݙکھیسوں۔ وزیر اعظم آکھیا جے اساں اے فیصلہ کر گھنوں جو اساں پاکستان کوں قرضیں کنوں نجات ݙویسوں خدائے بزرگ و برتر دی قسم اے مشکل ضرور اے ناممکن کائنی، ایندے کیتے صرف تے صرف قوت ارادی دی لوڑھ اے۔ وزیر اعظم آکھیا جے اساں اساں کمر ٻدھ گھنوں تے اے فیصلہ کر گھنوں جو ݙینہہ رات محنت کریسوں تاں اللہ تعالیٰ اساں کوں او مقام عطا فرمیسی جو قیام پاکستان دے ویلھے قائداعظم دی عظیم تحریک وچ شامل لکھاں مسلماناں قربانیاں ݙے تے حاصل کیتا تے خون دے دریا عبور کریندے اپݨے گھر ٻار چھوڑ تے اکھیں اچ اے خواب وسا تے چل پئے جو اساں پاکستان ویندے پیوں تے ہند و انگریز سامراج کنوں نجات حاصل کر تے ایں ملک وچ ویندے پیوں جتھاں اساں کوں صرف تے صرف میرٹ، محنت تے دیانت دی بنیاد تے موقع ملسن جیڑھا قائد اعظم دا خواب ہئی۔ وزیر اعظم آکھیا جو اساں مل تے او پالیسیاں بݨیندے پیوں جیڑھیاں قرضیں کنوں نجات حاصل کریسوں، سرمایہ کاری کوں اڳوں گھنسوں تے پاکستان کوں عظیم بݨیسوں جیندے کیتے کجھ پالیسیاں اعلان تھی چکئن تے کجھ تھیندیاں پئن۔ وزیر اعظم آکھیا جو سیاسی تے عسکری قیادت متفق اے جو اساں کوں ایں ملک کوں عظیم بݨاوݨا اے تے میݙا یقین اے جو اساں کرتے ݙکھیسوں۔ تقریب کنوں وزیر دفاع خواجہ محمد آصف، نائب وزیر اعظم تے وزیر خارجہ سینیٹر اسحاق ڈار، وفاقی وزیر سمندر پار پاکستانی چوہدری سالک حسین تے چیئرمین اوورسیز پاکستانیز فائونڈیشن قمررضا وی خطاب کیتا جݙاں جو تقریب وچ مختلف شعبہ ہائے زندگی نال تعلق رکھݨ آلے سمندر پار پاکستانیاں شرکت کیتی۔
